ઉદિત નારાયણ વિરુદ્ધ ગંભીર આક્ષેપો: પ્રથમ પત્નીનો દાવો – જાણ વગર કરાઈ સર્જરી

હિન્દી ફિલ્મ સંગીત જગતના જાણીતા ગાયક ઉદિત નારાયણ ફરી એકવાર વ્યક્તિગત જીવનને લઈ વિવાદોમાં ઘેરાયા છે. બિહારના સુપૌલ જિલ્લામાં સ્થિત મહિલા પોલીસ સ્ટેશનમાં તેમની પ્રથમ પત્ની હોવાનો દાવો કરતી રંજના ઝાએ ગંભીર આક્ષેપો સાથે ફરિયાદ નોંધાવી છે. રંજના ઝાનો આરોપ છે કે વર્ષ 1996 દરમિયાન દિલ્હીની એક હોસ્પિટલમાં તેમની મંજૂરી વગર સર્જરી કરી ગર્ભાશય દૂર કરવામાં આવ્યું હતું.

ફરિયાદ મુજબ, રંજનાએ જણાવ્યું છે કે તેમના અને ઉદિત નારાયણના લગ્ન 7 ડિસેમ્બર 1984ના રોજ થયા હતા. લગ્ન પછી ઉદિત નારાયણ ગાયકીમાં કારકિર્દી બનાવવા મુંબઈ સ્થાયી થયા અને ત્યાં બીજી વખત લગ્ન કર્યા હોવાનો પણ તેમણે આક્ષેપ કર્યો છે. રંજનાના કહેવા પ્રમાણે, 1996માં ઉદિત નારાયણ તથા તેમના ભાઈઓ સંજય અને લલિત ઝાએ તેમને દિલ્હીની એક ખાનગી હોસ્પિટલમાં લઈ ગયા હતા. તે સમયે ઉદિતની બીજી પત્ની પણ હાજર હતી. રંજના દાવો કરે છે કે તેમને સારવાર અંગે સંપૂર્ણ માહિતી આપવામાં આવી નહોતી અને ઓપરેશન પછી લાંબા સમય બાદ તેમને ખબર પડી કે તેમનું ગર્ભાશય કાઢી નાખવામાં આવ્યું છે.

રંજનાએ આ ઘટનાને પોતાના જીવનનો સૌથી મોટો આઘાત ગણાવ્યો છે. તેમના જણાવ્યા અનુસાર, આ સર્જરીના કારણે તેમની શારીરિક અને માનસિક સ્થિતિ પર ગંભીર અસર પડી. તેઓએ વધુમાં જણાવ્યું કે 2006માં તેઓ મદદની આશાએ મુંબઈમાં ઉદિત નારાયણના નિવાસસ્થાને ગયા હતા, પરંતુ ત્યાંથી તેમને પરત મોકલી દેવામાં આવ્યા. બાદમાં તેઓ નેપાળ પણ ગયા, પરંતુ ત્યાંથી પણ કોઈ સહાય મળી નહોતી. હાલ તેઓ આર્થિક સંકટનો સામનો કરી રહ્યા હોવાનું તેમણે જણાવ્યું છે.

સુપૌલ મહિલા પોલીસ મથકે ફરિયાદ નોંધ્યા બાદ તપાસ પ્રક્રિયા શરૂ કરી દીધી છે. પોલીસ સૂત્રો મુજબ, પ્રાથમિક માહિતી એકત્રિત કરવામાં આવી રહી છે અને સંબંધિત દસ્તાવેજો તથા પુરાવાઓની તપાસ કરવામાં આવશે. 

આ મામલે અત્યાર સુધી ઉદિત નારાયણ અથવા તેમના પરિવાર તરફથી કોઈ સત્તાવાર નિવેદન જાહેર થયું નથી.

નોંધનીય છે કે આ અગાઉ પણ રંજના ઝાએ છેતરપિંડી સંબંધિત આક્ષેપો કર્યા હતા, પરંતુ આ વખતે સર્જરી સંબંધિત ગંભીર દાવાઓને કારણે સોશિયલ મીડિયા અને ફિલ્મ જગતમાં ચર્ચા તેજ બની છે. હવે તપાસ બાદ જ હકીકતો સામે આવશે કે આ મામલે શું સત્ય છે.

આ સમગ્ર ઘટનાએ ફરી એકવાર સેલિબ્રિટીઓના વ્યક્તિગત જીવન અને કાનૂની મુદ્દાઓને લઈને ચર્ચા જગાવી છે. પોલીસ તપાસના પરિણામો પર સૌની નજર ટકેલી છે.

અહેવાલ: રોહિત પઢિયાર, ભુજ

મો.966 492 8653

અમારી સાથે જોડાવા માટે અહીં ક્લિક કરો.

ધ ન્યુઝ ટાઈમ્સ તમને સમાચારોથી હંમેશા અવગત રાખશે.

ગુજરાતની નંબર 1 ગુજરાતી ન્યૂઝ ચેનલ એટલે ધ ન્યુઝ ટાઈમ્સ (The News Times) – જે ગુજરાતીઓને દરેક સમાચારમાં રાખે છે આગળ. ગુજરાત, રાષ્ટ્રીય, આંતરરાષ્ટ્રીય, ઇલેક્શન, બિઝનેસ, સ્પોર્ટ્સ, મનોરંજન સહિતના દરેક સમાચાર વાંચો ધ ન્યુઝ ટાઈમ્સ પર. હવે દરેક સમાચાર આંગળીના ટેરવે આપના મોબાઈલમા, ડાઉનલોડ કરો અમારી લેટેસ્ટ Android એપ. લેટેસ્ટ ન્યૂઝ થી અપડેટ રહેવા માટે સોશ્યિલ મીડિયા પ્લેટફોર્મ પર અમારી સાથે જોડાઓ.