શ્રીનગર : કાશ્મીરમાં ગુંજ્યો સરદાર પટેલનો ઇતિહાસ: ‘અખંડ ભારતના શિલ્પીની કાશ્મીર ગાથા’ ગ્રંથનું લોકાર્પણ

ઈતિહાસકાર ડૉ. રીઝવાન કાદરી દ્વારા સંશોધિત અને સંપાદિત આ ગ્રંથમાં કુલ ૧૧૯ પ્રકરણોનો સમાવેશ કરવામાં આવ્યો છે. પુસ્તકમાં સરદાર વલ્લભભાઈ પટેલ અને કાશ્મીર સાથે સંકળાયેલા ઐતિહાસિક પાસાઓને સંશોધનના આધારે રજૂ કરવામાં આવ્યા છે.

આ પ્રસંગે લેફ્ટનન્ટ ગવર્નર શ્રી મનોજ સિંહાએ ગ્રંથના પ્રકાશનને આવકારતાં જણાવ્યું હતું કે, રાષ્ટ્ર માટે કરવામાં આવેલા સંકલન અને સંશોધન દ્વારા ઇતિહાસના મહત્વપૂર્ણ પાસાઓને ઉજાગર કરવામાં આવ્યા છે. તેમણે સરદાર વલ્લભભાઈ પટેલના રાષ્ટ્રના એકીકરણમાં રહેલા યોગદાનને યાદ કરતાં વિવિધતામાં એકતા અને રાષ્ટ્રીય એકતાના મહત્વ પર ભાર મૂક્યો હતો.

તેમણે શ્રી સ્વામિનારાયણ ગાદી સંસ્થાન દ્વારા આધ્યાત્મિક પ્રવૃત્તિઓ ઉપરાંત માનવીય અભિગમ સાથે કરવામાં આવતાં વિવિધ કાર્યોની પણ પ્રશંસા કરી હતી.રાષ્ટ્રીય અનુસૂચિત જાતિ આયોગના ચેરમેન શ્રી કિશોરભાઈ મકવાણાએ જણાવ્યું હતું કે, શ્રી સ્વામિનારાયણ ગાદી સંસ્થાન દ્વારા અંગ્રેજી ભાષામાં આ ગ્રંથનું પ્રકાશન કરી ઐતિહાસિક વિષયને વ્યાપક વાચકવર્ગ સુધી પહોંચાડવાનું કાર્ય કરવામાં આવ્યું છે.

ઈતિહાસકાર ડૉ. રીઝવાન કાદરીએ સંસ્થાનનો આભાર વ્યક્ત કરતાં જણાવ્યું હતું કે, સરદાર પટેલના રાષ્ટ્ર નિર્માણ અને લોકહિત સાથે જોડાયેલા કાર્યો અંગેના સંશોધનને પ્રોત્સાહન આપવા બદલ તેઓ સંસ્થાન પ્રત્યે ઋણ સ્વીકારે છે. કાર્યક્રમમાં વિવિધ ક્ષેત્રના મહાનુભાવો ઉપસ્થિત રહ્યા હતા.