માલદે સોઢા પરિવારની એકતાનો શંખનાદ: ભુજમાં બનશે આધુનિક સમાજ ભવન

ભુજમાં માલદે સોઢા પરિવારનો ભવ્ય સમાજ ભવન બનાવવાનો સંકલ્પ, એકતાથી વિકાસની નવી દિશા

ભુજ: અખિલ માલદે સોઢા પરિવાર સેવા ટ્રસ્ટની મહત્વપૂર્ણ કારોબારી બેઠક ભુજ ખાતે સમાજ પ્રમુખ હમીરસિંહ સોઢાના અધ્યક્ષસ્થાને યોજાઈ હતી. કચ્છ ઉપરાંત વાગડ, મોરબી અને જામનગરના વિવિધ વિસ્તારોમાંથી આવેલા સમાજના આગેવાનો અને કારોબારી સભ્યોની ઉપસ્થિતિથી બેઠકમાં સંગઠન અને એકતાનો માહોલ જોવા મળ્યો હતો. દીપ પ્રાગટ્ય સાથે બેઠકનો પ્રારંભ કરવામાં આવ્યો હતો.

બેઠક દરમિયાન ટ્રસ્ટની આર્થિક વ્યવસ્થા અને અત્યારસુધીની કામગીરી અંગે મહામંત્રી ખનુભા સોઢાએ વિગતવાર માહિતી રજૂ કરી હતી. ટ્રસ્ટના હિસાબોમાં પારદર્શિતા જળવાઈ રહે તે માટે આવક-જાવકની વિગતો સભ્યો સમક્ષ રજૂ કરવામાં આવી હતી. દાતાઓને સરળતાથી સહયોગ આપી શકાય તે માટે સ્ટેટ બેંકમાં ટ્રસ્ટનું ખાતું શરૂ કરવામાં આવ્યું છે અને સીધી રકમ જમા કરાવવા માટે સ્કેનરની સુવિધા પણ ઉપલબ્ધ કરાવવામાં આવી હોવાનું જણાવાયું હતું.

સમાજને આર્થિક અને સંગઠનાત્મક રીતે વધુ મજબૂત બનાવવા બેઠકમાં સભ્યપદ અને યોગદાન અંગે પણ નિર્ણયો લેવાયા હતા. દરેક પરિવાર પાસેથી વાર્ષિક રૂ. ૧,૧૦૦નું યોગદાન, કાયમી સભ્યપદ માટે રૂ. ૨,૧૦૦ અને કાયમી ટ્રસ્ટીપદ માટે રૂ. ૫૧,૦૦૦ નક્કી કરવામાં આવ્યા હતા.

યુવા પેઢીના ઉજ્જવળ ભવિષ્યને ધ્યાનમાં રાખીને શિક્ષણ અને આરોગ્ય ક્ષેત્રે સહાય વધારવા તથા પ્રતિભાશાળી વિદ્યાર્થીઓને ઉચ્ચ અભ્યાસ માટે પ્રોત્સાહન આપવા પર ભાર મૂકાયો હતો. સમાજના યુવક-યુવતીઓ શિક્ષણ, રોજગાર અને વ્યવસાયમાં આગળ વધે અને ઉચ્ચ સરકારી હોદ્દાઓ સુધી પહોંચે તે માટે માર્ગદર્શન તથા પ્રોત્સાહનની જરૂરિયાત પર આગેવાનોએ ભાર મૂક્યો હતો.

આ પણ વાંચો...

ભુજમાં રોયલ ફાઉન્ડેશન દ્વારા...

બેઠકનું સૌથી મહત્વપૂર્ણ આકર્ષણ ભુજમાં અખિલ માલદે સોઢા પરિવારના ભવ્ય સમાજ ભવનના નિર્માણનો સંકલ્પ રહ્યો. સમાજ પ્રમુખ હમીરજી સોઢાએ યોગ્ય જમીન મેળવી આધુનિક સુવિધાઓથી સજ્જ વિશાળ સમાજ ભવન ઉભું કરવાની જાહેરાત કરી હતી. આ પ્રકલ્પમાં સમગ્ર સમાજના સહયોગથી વહેલી તકે કામગીરી શરૂ કરવાનો નિર્ધાર વ્યક્ત થયો હતો.

આ ઉપરાંત કુળદેવી શ્રી સચ્ચિયા માતાજીના ભવ્ય ધાર્મિક કાર્યક્રમ અંગે પણ ચર્ચા થઈ હતી. કરશનજી સોઢાના પ્રસ્તાવને સર્વાનુમતે મંજૂરી આપી પરિવારની ધજા ચઢાવી ધાર્મિક કાર્યક્રમ યોજવાનો નિર્ણય લેવાયો હતો.

બેઠકમાં અનેક વરિષ્ઠ આગેવાનો અને કારોબારી સભ્યો ઉપસ્થિત રહ્યા હતા. સમગ્ર આયોજન દ્વારા સમાજમાં એકતા, શિક્ષણ, યુવા સશક્તિકરણ અને સામૂહિક વિકાસ માટે નવી દિશા નક્કી થઈ હોવાનું ઉપસ્થિત આગેવાનોએ જણાવ્યું હતું.

______________________________

અમારી સાથે જોડાવા માટે અહીં ક્લિક કરો.

ધ ન્યુઝ ટાઈમ્સ તમને સમાચારોથી હંમેશા અવગત રાખશે.

ગુજરાતની નંબર 1 ગુજરાતી ન્યૂઝ ચેનલ એટલે ધ ન્યુઝ ટાઈમ્સ (The News Times) – જે ગુજરાતીઓને દરેક સમાચારમાં રાખે છે આગળ. ગુજરાત, રાષ્ટ્રીય, આંતરરાષ્ટ્રીય, ઇલેક્શન, બિઝનેસ, સ્પોર્ટ્સ, મનોરંજન સહિતના દરેક સમાચાર વાંચો ધ ન્યુઝ ટાઈમ્સ પર. હવે દરેક સમાચાર આંગળીના ટેરવે આપના મોબાઈલમા, ડાઉનલોડ કરો અમારી લેટેસ્ટ Android એપ. લેટેસ્ટ ન્યૂઝ થી અપડેટ રહેવા માટે સોશ્યિલ મીડિયા પ્લેટફોર્મ પર અમારી સાથે જોડાઓ.