મુંબઈ : ૫,૦૦૦ નિરાધાર લોકો માટે આજીવન ઘર બનાવશે અંબાણી પરિવાર

રોહિત પઢિયાર | મુંબઈ : સમાજમાં એવા અનેક લોકો છે જેમની પાસે રહેવા માટે ઘર નથી, તો કેટલાક એવા પણ છે જેમને જીવનભર વિશેષ સંભાળ અને તબીબી સહાયની જરૂર રહે છે. આવા નિરાધાર, દિવ્યાંગ અને એકલવાયું જીવન જીવતા લોકો માટે રિલાયન્સ ફાઉન્ડેશન એક મહત્ત્વાકાંક્ષી સામાજિક પહેલ કરવા જઈ રહ્યું છે. ફાઉન્ડેશનનાં સ્થાપક અને ચેરપર્સન નીતા એમ. અંબાણીએ મુંબઈ નજીક કરજત ખાતે ‘નીતા મુકેશ અંબાણી અનંત આશ્રય’ સ્થાપવાની જાહેરાત કરી છે. આશરે ૧૦૦ એકરમાં વિકસનારી આ વિશાળ ટાઉનશિપ ૫,૦૦૦થી વધુ લોકોને આજીવન ઘર અને પરિવાર જેવી હૂંફ આપવાના હેતુથી તૈયાર કરવામાં આવશે.

આ પ્રોજેક્ટનું ભૂમિપૂજન અને શિલાન્યાસ તાજેતરમાં કરજત ખાતે યોજાયો હતો, જેમાં નીતા અંબાણી અને રિલાયન્સ ફાઉન્ડેશનનાં ડિરેક્ટર ઈશા અંબાણી ઉપસ્થિત રહ્યાં હતાં. આ ટાઉનશિપમાં અનાથ બાળકો, વરિષ્ઠ નાગરિકો તેમજ જન્મથી અથવા ગર્ભાવસ્થા દરમિયાન વિકસેલી દિવ્યાંગતા ધરાવતા લોકોને પ્રાથમિકતા આપવામાં આવશે. અહીં માત્ર રહેવાની વ્યવસ્થા જ નહીં, પરંતુ દરેક વ્યક્તિને આત્મસન્માન સાથે સ્વતંત્ર અને અર્થપૂર્ણ જીવન જીવવાની તક આપવાનું આયોજન છે.

નીતા અંબાણીના જણાવ્યા અનુસાર, આ પહેલ પાછળનો મુખ્ય ઉદ્દેશ એવા પરિવારોની ચિંતા દૂર કરવાનો છે, જેઓ પોતાના દિવ્યાંગ સંતાનોના ભવિષ્યને લઈને સતત ચિંતિત રહે છે. માતા-પિતાની ગેરહાજરીમાં પણ તેમનાં સંતાનોને સુરક્ષિત ઘર, પરિવાર જેવી લાગણી અને જીવનભર સંભાળ મળી રહે તે આ પ્રકલ્પની વિશેષતા રહેશે.

ટાઉનશિપમાં આઠ રહેણાંક ગામો વિકસાવવામાં આવશે, જેનાં નામ ભારતની પવિત્ર નદીઓ પરથી રાખવામાં આવશે. દરેક ગામમાં નાના કૌટુંબિક ઘરો, બગીચા, મંદિર, હોસ્પિટલ, રમતગમતનાં મેદાનો, ફાર્મ અને વર્કશોપ જેવી સુવિધાઓ ઊભી કરાશે. નિવાસીઓની જરૂરિયાત મુજબ હાઉસ પેરેન્ટ્સ અને તાલીમબદ્ધ કેરટેકર્સ તેમની સંભાળ રાખશે. દરેક વ્યક્તિ માટે આરોગ્ય, શિક્ષણ, કૌશલ્ય વિકાસ અને રોજગારને આવરી લેતી વ્યક્તિગત સંભાળ યોજના પણ તૈયાર કરવામાં આવશે.

કરજતમાં ૧૦૦ એકરમાં આકાર લેશે ‘અનંત આશ્રય’, હોસ્પિટલથી લઈને શિક્ષણ અને રોજગાર સુધીની સુવિધાઓ મળશે

આ પ્રોજેક્ટમાં વિશેષ તબીબી સેવાઓ ધરાવતી હોસ્પિટલ, આધુનિક પુનર્વસન કેન્દ્ર, ફિઝિયોથેરાપી, સ્પીચ થેરાપી, ઓક્યુપેશનલ થેરાપી અને હાઇડ્રોથેરાપીની સુવિધાઓ ઉપલબ્ધ કરાવાશે. ઓટિઝમ, સેરેબ્રલ પાલ્સી, એપિલેપ્સી અને જટિલ તબીબી સમસ્યાઓ ધરાવતા લોકો માટે નિષ્ણાત સારવારની વ્યવસ્થા પણ હશે. દિવ્યાંગ બાળકો માટે વિશેષ શિક્ષણ, જ્યારે સ્ટાફનાં બાળકો માટે સામાન્ય શાળાની વ્યવસ્થા કરવામાં આવશે.

રોજગાર અને આત્મનિર્ભરતાને પ્રોત્સાહન આપવા બેકરી, કાફે અને હસ્તકલાના સ્ટુડિયો શરૂ કરવાનું પણ આયોજન છે. સાથે જ પ્રાણીઓ સાથે લાગણીસભર જોડાણ માટે વનતારા સાથે મળીને વિશેષ ફાર્મ વિકસાવાશે. આ ઉપરાંત રાષ્ટ્રીય તાલીમ અકાદમી, મોબાઇલ મેડિકલ ક્લિનિક્સ અને પરિવારજનો માટે રેસ્પાઇટ કેરની સુવિધા પણ ઊભી કરાશે.

આ ટાઉનશિપનો લાભ માત્ર નિવાસીઓ પૂરતો સીમિત નહીં રહે. આસપાસના ગ્રામ્ય વિસ્તારોના અંદાજે ૧,૦૦૦ લોકોને રોજગાર, શિક્ષણ અને થેરાપીની તકો મળવાની અપેક્ષા છે. સમગ્ર પ્રોજેક્ટ અંદાજે ૧૫,૦૦૦ લોકોના સમુદાયને સમાવી શકે તે રીતે પરિકલ્પિત છે. તમામ જરૂરી મંજૂરીઓને આધીન તબક્કાવાર નિર્માણ પામનાર આ બિનનફાકારક પહેલનો મુખ્ય સંદેશ એ છે કે કોઈ વ્યક્તિ ઘર, સંભાળ અને સન્માનથી વંચિત ન રહે.