પશ્ચિમ કચ્છ-ભુજ લોકલ ક્રાઈમ બ્રાન્ચ દ્વારા ભુજ શહેરમાં શંકાસ્પદ રીતે લઈ જવાતા એલ્યુમિનિયમ વાયરના જથ્થા અંગે કાર્યવાહી હાથ ધરવામાં આવી હતી. બી-ડિવિઝન પોલીસ સ્ટેશન વિસ્તારમાંથી આધાર-પુરાવા વિના એલ્યુમિનિયમ વાયરનો જથ્થો લઈ જતા ત્રણ ઇસમોને ઝડપી પાડવામાં આવ્યા હોવાનું પોલીસ દ્વારા જણાવાયું છે. આ કાર્યવાહી દરમિયાન પોલીસે વાયર તથા તેને લઈ જવા માટે ઉપયોગમાં લેવાયેલા માલવાહક વાહન સહિત કુલ રૂ.4.35 લાખનો મુદ્દામાલ કબજે કર્યો છે.
પોલીસની પ્રાથમિક વિગતો મુજબ, ઝડપાયેલા ઇસમો પાસે એલ્યુમિનિયમ વાયર અંગે જરૂરી આધાર-પુરાવા કે માલિકી સંબંધિત દસ્તાવેજો મળી આવ્યા નહોતા. જેના પગલે પોલીસે શંકાસ્પદ જથ્થો કબજે કરી સમગ્ર મામલે તપાસ શરૂ કરી છે. કબજે કરવામાં આવેલા એલ્યુમિનિયમ વાયરનું વજન આશરે 350 કિલોગ્રામ હોવાનું સામે આવ્યું છે, જેની અંદાજિત કિંમત રૂ.3.35 લાખ જેટલી હોવાનું નોંધાયું છે.
આ ઉપરાંત વાયરનો જથ્થો લઈ જવા માટે ઉપયોગમાં લેવાયેલ ટાટા કંપનીનું ‘જીતો’ માલવાહક વાહન, રજીસ્ટ્રેશન નંબર GJ-12-BT-9385, પણ પોલીસે કબજે કર્યું છે. આ વાહનની કિંમત આશરે રૂ.1 લાખ ગણવામાં આવી છે. આમ, પોલીસે વાયર અને વાહન સહિત કુલ રૂ.4.35 લાખનો મુદ્દામાલ કબજે કરી કાયદેસરની કાર્યવાહી હાથ ધરી છે.
આ પણ વાંચો
આ કાર્યવાહીમાં ભાખરીયા, તા.ભુજના રહેવાસી સુલતાન અમર અબડા, નાના વરનોરા, ભુજના મમણ ફળિયામાં રહેતા હાફીઝ રઝાક મમણ તથા ભુજ તાલુકાના રહેવાસી આસીફ ઉમર અબડાને ઝડપી પાડવામાં આવ્યા છે.
આ સમગ્ર કામગીરી PI એ.એમ. મકવાણા અને PSI જે.બી. જાદવના માર્ગદર્શન હેઠળ એમ.એચ. શીણોલ, ASI પંકજકુમાર કુશવાહા, HC નવીનભાઈ જોષી, શ્યામભાઈ ગઢવી તથા PC ભરતભાઈ ગઢવી સહિતના પોલીસ કર્મચારીઓ દ્વારા કરવામાં આવી હતી. પોલીસે કબજે કરાયેલા વાયર અંગે વધુ તપાસ શરૂ કરી છે અને આ જથ્થો ક્યાંથી આવ્યો તથા ક્યાં લઈ જવાતો હતો તે સહિતના મુદ્દાઓ અંગે તપાસ હાથ ધરાઈ છે.
0 ટિપ્પણીઓ: