વલસાડ : વલસાડમાં સ્વરોજગારને મળ્યો નવો આયામ: 31 દિવસીય ફોટોગ્રાફી-વિડિયોગ્રાફી તાલીમ પૂર્ણ, યુવાનોને મળ્યો વ્યવસાયનો આત્મવિશ્વાસ

વલસાડમાં સ્વરોજગારને મળ્યો નવો આયામ

વલસાડ ખાતે આવેલી બેન્ક ઓફ બરોડા રૂરલ સેલ્ફ એમ્પ્લોયમેન્ટ ટ્રેનિંગ ઇન્સ્ટિટ્યૂટ (RSETI) દ્વારા આયોજિત 31 દિવસીય ફોટોગ્રાફી અને વિડિયોગ્રાફી તાલીમ કાર્યક્રમ સફળતાપૂર્વક પૂર્ણ થતાં તાલીમાર્થીઓમાં ઉત્સાહ અને આત્મવિશ્વાસનો માહોલ જોવા મળ્યો હતો. સ્વરોજગારને પ્રોત્સાહન આપવાના ઉદ્દેશ સાથે યોજાયેલા આ તાલીમ કાર્યક્રમમાં જિલ્લાના વિવિધ વિસ્તારોમાંથી આવેલા યુવાનોએ ઉત્સાહભેર ભાગ લઈ આધુનિક ફોટોગ્રાફી અને વિડિયોગ્રાફીની કળામાં નિપુણતા હાંસલ કરી હતી.

ગત 21 મેના રોજ શરૂ થયેલી આ તાલીમ દરમિયાન વિદ્યાર્થીઓને માત્ર કેમેરા સંચાલન કે ફોટોગ્રાફી સુધી મર્યાદિત રાખવામાં આવ્યા નહોતા, પરંતુ તેમને વ્યવસાયિક ક્ષેત્રમાં સફળતા મેળવવા માટે જરૂરી અનેક પાસાઓ અંગે માર્ગદર્શન આપવામાં આવ્યું હતું. તાલીમ દરમિયાન બેઝિકથી લઈને એડવાન્સ લેવલ સુધીની ફોટોગ્રાફી અને વિડિયોગ્રાફી, લાઇટિંગ ટેક્નિક્સ, કેમેરા એંગલ્સ, વીડિયો એડિટિંગ તેમજ ડિજિટલ મીડિયાના બદલાતા ટ્રેન્ડ્સ અંગે વિસ્તૃત માહિતી આપવામાં આવી હતી.

DST ટ્રેનર નૈતિક જાદવના માર્ગદર્શન હેઠળ તાલીમાર્થીઓને વિવિધ પ્રેક્ટિકલ પ્રોજેક્ટ્સ કરાવવામાં આવ્યા હતા. જેમાં હલ્દી સમારોહનું શૂટિંગ, કાર લોન્ચ ઇવેન્ટનું કવરેજ, નાઇટ ફોટોગ્રાફી તેમજ સિનેમેટિક વિડિયો નિર્માણ જેવી પ્રવૃત્તિઓનો સમાવેશ થતો હતો. આ પ્રાયોગિક અભ્યાસક્રમના કારણે વિદ્યાર્થીઓને વાસ્તવિક કાર્યક્ષેત્રનો અનુભવ પ્રાપ્ત થયો હતો.

તાલીમનો અંતિમ તબક્કો તરીકે 20 જૂનના રોજ તાલીમાર્થીઓનું મૂલ્યાંકન કરવામાં આવ્યું હતું. થિયરી, પ્રેક્ટિકલ અને વાઇવા એમ ત્રણ અલગ-અલગ માધ્યમોથી લેવામાં આવેલા આ એસેસમેન્ટમાં તાલીમાર્થીઓએ નોંધપાત્ર પ્રદર્શન કર્યું હતું. એસેસમેન્ટ પ્રક્રિયામાં કચ્છ-ભુજના જાણીતા ફોટોગ્રાફી નિષ્ણાત રોહિત પાઢીયાર તેમજ બીલીમોરાના ભીખુ પટેલે ડોમેઇન એસેસર તરીકે સેવા આપી હતી.

ફોટોગ્રાફી અને વિડિયોગ્રાફી ઉપરાંત તાલીમાર્થીઓને કમ્યુનિકેશન સ્કિલ, ગ્રાહકો સાથે અસરકારક વ્યવહાર કરવાની કળા, વ્યક્તિત્વ વિકાસ અને બેન્કિંગ વ્યવસ્થાની મૂળભૂત માહિતી પણ આપવામાં આવી હતી. આ તાલીમનો મુખ્ય હેતુ માત્ર કૌશલ્ય વિકાસ નહીં પરંતુ યુવાનોને સ્વરોજગાર માટે સક્ષમ બનાવવાનો હતો.

RSETI દ્વારા તાલીમાર્થીઓને સમગ્ર તાલીમ દરમિયાન રહેવા, જમવા, ચા-નાસ્તા સહિતની તમામ સુવિધાઓ વિનામૂલ્યે પૂરી પાડવામાં આવી હતી, જેના કારણે દૂરના વિસ્તારોમાંથી આવેલા વિદ્યાર્થીઓને પણ તાલીમનો પૂરતો લાભ મળી શક્યો હતો.

આ પણ વાંચો...
જામનગર ખાતે મેટા દ્વારા....

વેલિડેશન અને સમાપન કાર્યક્રમ દરમિયાન બેંક ઓફ બરોડાના ચીફ મેનેજર અનામિકા મેડમ, RSETIના ડિરેક્ટર આકાશ કોઠારી, ટ્રેનર નૈતિક જાદવ, એસેસર રોહિત પાઢીયાર, ભીખુ પટેલ તેમજ સંસ્થાના અન્ય સ્ટાફ સભ્યો ઉપસ્થિત રહ્યા હતા. કાર્યક્રમના અંતે સફળતાપૂર્વક તાલીમ પૂર્ણ કરનાર તમામ તાલીમાર્થીઓને પ્રમાણપત્રો એનાયત કરવામાં આવ્યા હતા અને તેમના ઉજ્જવળ કારકિર્દી તથા સ્વરોજગારના ભવિષ્ય માટે શુભેચ્છાઓ પાઠવવામાં આવી હતી.

આ તાલીમ કાર્યક્રમે અનેક યુવાનોને નવી દિશા અને નવી ઓળખ આપી છે. આધુનિક યુગમાં ઝડપથી વિકસતા ફોટોગ્રાફી અને વિડિયોગ્રાફી ક્ષેત્રમાં હવે આ તાલીમાર્થીઓ આત્મવિશ્વાસ સાથે પોતાની કારકિર્દીની નવી શરૂઆત કરવા માટે તૈયાર બન્યા છે.

______________________________

અહેવાલ: રોહિત પઢિયાર | ભુજ - કચ્છ.

અમારી સાથે જોડાવા માટે અહીં ક્લિક કરો.

ધ ન્યુઝ ટાઈમ્સ તમને સમાચારોથી હંમેશા અવગત રાખશે.

ગુજરાતની નંબર 1 ગુજરાતી ન્યૂઝ ચેનલ એટલે ધ ન્યુઝ ટાઈમ્સ (The News Times) – જે ગુજરાતીઓને દરેક સમાચારમાં રાખે છે આગળ. ગુજરાત, રાષ્ટ્રીય, આંતરરાષ્ટ્રીય, ઇલેક્શન, બિઝનેસ, સ્પોર્ટ્સ, મનોરંજન સહિતના દરેક સમાચાર વાંચો ધ ન્યુઝ ટાઈમ્સ પર. હવે દરેક સમાચાર આંગળીના ટેરવે આપના મોબાઈલમા, ડાઉનલોડ કરો અમારી લેટેસ્ટ Android એપ. લેટેસ્ટ ન્યૂઝ થી અપડેટ રહેવા માટે સોશ્યિલ મીડિયા પ્લેટફોર્મ પર અમારી સાથે જોડાઓ.