મુંદરાના વેપારીએ કર્યું આવું જાણીને તમે પણ ચોંકી જશો

મુંદરાની પ્રમાણિકતાનો મીઠો સ્વાદ : વેપાર કરતાં વિશ્વાસને આપ્યું પ્રથમ સ્થાન

કચ્છના મુંદરા શહેરમાં એક એવી ઘટના સામે આવી છે, જેણે આજના સ્વાર્થભર્યા સમયમાં પણ માનવતા, વિશ્વાસ અને પ્રમાણિકતા હજુ જીવંત હોવાનું સાબિત કરી દીધું છે. રોજિંદા જીવનમાં જ્યાં નાણાં માટે સંબંધો અને સિદ્ધાંતો તૂટતા જોવા મળે છે, ત્યાં મુંદરાના જાણીતા વેપારી રાજેન્દ્ર ગોપાલજી ભગદે, જેમને લોકો પ્રેમથી ‘રાજુ સત્યમ’ તરીકે ઓળખે છે, તેમણે પોતાના આદર્શ વર્તનથી સમગ્ર પંથકનું દિલ જીતી લીધું છે.

આ પણ વાંચો....
ગાંધીધામ ચેમ્બર ભવનમાં....

મુંદરાની મુખ્ય બજારમાં છેલ્લા ત્રણ દાયકાથી “સત્યમ શ્રીખંડ” નામે વ્યવસાય ચલાવતા રાજુભાઈ માત્ર સ્વાદ અને ગુણવત્તા માટે જ નહીં, પરંતુ પોતાની સચ્ચાઈ અને સરળ સ્વભાવ માટે પણ જાણીતા છે. તાજેતરમાં બનેલી એક ઘટનાએ તેમની આ ઓળખને વધુ મજબૂત બનાવી છે.

ગુરુવારની રાત્રે તેમની દુકાને એક ગ્રાહક શ્રીખંડ ખરીદવા આવ્યા હતા. ખરીદીનું બિલ માત્ર 390 રૂપિયા બનતું હતું, પરંતુ ઓનલાઇન પેમેન્ટ કરતી વખતે ગ્રાહકથી અજાણતા 39 હજાર રૂપિયાની રકમ ટ્રાન્સફર થઈ ગઈ. રાત્રિનો સમય અને ઉતાવળ હોવાને કારણે ગ્રાહકને પોતાની ભૂલની જાણ થઈ નહોતી અને તેઓ ત્યાંથી નીકળી ગયા હતા.

બીજી તરફ દિવસ પૂર્ણ થયા બાદ રોજની જેમ રાજુભાઈ હિસાબ ચકાસી રહ્યા હતા ત્યારે એક અસામાન્ય મોટી રકમ તેમની નજરે ચડી. અનુભવી વેપારી તરીકે તેમણે તરત જ સમજી લીધું કે કોઈ ગ્રાહક પાસેથી ભૂલથી વધારાની રકમ આવી ગઈ છે. તેમણે તે બાબતની નોંધ કરી અને યોગ્ય વ્યક્તિને રકમ પરત આપવા માટે તૈયારી રાખી.

જ્યારે બીજા દિવસે ગ્રાહક પોતાની ભૂલ સમજ્યા બાદ દુકાને પહોંચ્યા, ત્યારે રાજુભાઈએ વિલંબ કર્યા વગર વધારાની સંપૂર્ણ રકમ પરત કરી દીધી. આ સમગ્ર ઘટનાએ ગ્રાહકને જ નહીં પરંતુ મુંદરાના લોકોને પણ સ્પર્શી લીધા. આજના સમયમાં જ્યાં ઘણીવાર લોકો ભૂલથી મળેલી રકમ પર પોતાનો હક માનતા હોય છે, ત્યાં રાજુભાઈએ પોતાની સત્યનિષ્ઠા દ્વારા અલગ ઓળખ ઉભી કરી છે.

રાજુ સત્યમ માત્ર વેપારી નથી, પરંતુ સમાજજીવનમાં પણ સક્રિય ભૂમિકા ભજવી રહ્યા છે. છેલ્લા ઘણા વર્ષોથી તેઓ સામાજિક અને જાહેર કાર્યોમાં જોડાયેલા છે અને લોકો વચ્ચે સેવા તથા સહકારની ભાવના માટે જાણીતા છે. તેમના પરિવારનું નામ પણ મુંદરામાં વિશ્વાસ અને સેવાભાવ સાથે જોડાયેલું માનવામાં આવે છે.

સ્થાનિક લોકોના કહેવા મુજબ “સત્યમ” માત્ર દુકાનનું નામ નથી, પરંતુ તે વિશ્વાસનું પ્રતિક બની ગયું છે. ગુણવત્તાસભર ઉત્પાદનો સાથે પારદર્શક વ્યવહાર અને માનવતાભર્યું વર્તન જ આ પરિવારને સમાજમાં વિશેષ સ્થાન અપાવે છે.

આ પણ વાંચો....
ભુજ કોમર્શિયલ બેંકના ચેરમેને......

આ સમગ્ર ઘટના એ વાતનો જીવંત દાખલો બની છે કે વેપારમાં નફા કરતાં વિશ્વાસ વધુ મહત્વનો હોય છે. મુંદરાના લોકો આજે રાજુ સત્યમની પ્રશંસા કરતાં થાકતા નથી અને તેમની આ સચ્ચાઈને સમાજ માટે પ્રેરણારૂપ ગણાવી રહ્યા છે.

______________________________
અહેવાલ: રોહિત પઢિયાર | ભુજ - કચ્છ.

અમારી સાથે જોડાવા માટે અહીં ક્લિક કરો.

ધ ન્યુઝ ટાઈમ્સ તમને સમાચારોથી હંમેશા અવગત રાખશે.

ગુજરાતની નંબર 1 ગુજરાતી ન્યૂઝ ચેનલ એટલે ધ ન્યુઝ ટાઈમ્સ (The News Times) – જે ગુજરાતીઓને દરેક સમાચારમાં રાખે છે આગળ. ગુજરાત, રાષ્ટ્રીય, આંતરરાષ્ટ્રીય, ઇલેક્શન, બિઝનેસ, સ્પોર્ટ્સ, મનોરંજન સહિતના દરેક સમાચાર વાંચો ધ ન્યુઝ ટાઈમ્સ પર. હવે દરેક સમાચાર આંગળીના ટેરવે આપના મોબાઈલમા, ડાઉનલોડ કરો અમારી લેટેસ્ટ Android એપ. લેટેસ્ટ ન્યૂઝ થી અપડેટ રહેવા માટે સોશ્યિલ મીડિયા પ્લેટફોર્મ પર અમારી સાથે જોડાઓ.